宮

李信 (朱智勛) 申彩靜 (尹恩惠) 李律 (金政勛)

最近簡直係不見天日咁全程煲呢套劇~ 成個星期都日日5點先訓, 朝早爬起身返工, 真係人都癲!! 不過點都唔夠我尋晚, 一晚煲晒佢, 仲要睇到今朝9點先訓!! 好好睇, 雖然我唔太喜歡韓劇, 因為我好怕個D要生又要死既韓劇, 但係呢套真係唔錯, 有D搞笑, 有D感動!!! 推介推介!! (安安, 睇到呢個message既話, 記住呢套真係幾好睇架, 有機會買返屋企睇)

不過後面個4集真係超拖, 成日覺得佢兩個跟本就唔洗咁!! 雖然都係我鍾意既大團圓結局, 但係都係好令人心急~(其實最後個四集係為黎緊既續集埋下伏線, 所以一定拖!!!超勁呀, 未播完已經話要拍續集, 希望好睇啦, 我自己對續集都係唔好期望咁大, 不過有信同彩靜, 我都會睇既!) 呢套劇D景未必係全部實景, 但係都會見到制作用心, 而且信同彩靜套套衫都超靚, 仲要襯埋一set 慌死你地D人唔知佢倆個係夫婦!!! 我係覺得係套戲入面信太瘦啦, 而且著D衫超基佬feel!! 雖然佢carry 得好好(本身係model), 但男人老狗粉紅波點上身真係頂唔順!!! 不過完全估唔到係全套劇既主角都係新人, 未必係完全新人, 但肯定係第一次拍戲!!

最最感動係信對住全國人民講出心底話, 話佢真係愛上彩靜, 好真實好感動! 同埋當信被懷疑係縱火案疑犯, 彩靜同信終於可以破鏡重圓, 講出心底話後, 大家終於可以確認彼此(佢地兩個仲激吻添呀!!!)

宮係令我對韓劇有少少改觀既電視劇, 但係韓劇要生要死既劇情依然唔係我杯茶~ 我會期待宮2, 希望好快可以再見到信同彩靜!

PS: 我對呢套劇最鍾意既地方, 係D熊仔呀, 好得意!!!